احسن جوکيو: مشهور محقق، عالم، شاعر ۽ استاد احسن جوکيي جو پورو نالو احسان علي احسن جوکيو آهي. هن پهرين جنوري 1936ع ڌاري ڳوٺ يامين جوکيو، ملير ڪراچيءَ ۾ جنم ورتو. نوڪريءَ سانگي پاڻ گهڻو عرصو ٺٽي ۽ گهاري ۾ رهيو.پاڻ سنڌي، اردو، عربي ۽ فارسي ٻولين جو ڄاڻو، سنڌي ۽ فارسيءَ جو صاحب ديوان شاعر ٿي گذريو آهي. شروع ۾ کيس پٽيوالي جي نوڪري ملي، پر 1955ع ۾ کيس اسسٽنٽ ماستر ڪري ڪاٺوڙ ۾ مقرر ڪيو ويو، ڪاٺوڙ ۾ اچڻ کانپوءِ هُو سنڌي ادبي سنگت جو حصو بڻيو ۽ علمي ادبي سرگرمين ۾ حصو وٺڻ لڳو. نوڪريءَ دان هن مئٽرڪ، انٽر، بي.ايڊ ۽ ايم. ايڊ ڪيائين. انهيءَ دوران هو انگريزي سکيو. 1974ع ۾ پاڻ سنڌ پبلڪ سروس ڪميشن پاران ليڪچرر جي امتحان ۾ به ويٺو، پر کيس هيڊ ماستر جو آرڊر ڏنو ويو، اهڙيءَ طرح پاڻ ڪيترن ئي اسڪولن جو هيڊ ماستر رهيو، سپروائيزر ۽ ايڊيشنل ڊي اي او به رهيو. نيٺ 1996ع ۾ نوڪريءَ تان رٽائر ڪيائين. ان بعد هن پنهنجو سٺو ڌيان لکڻ پڙهڻ تي ڏنو ۽ ڪيترائي ڪتاب لکي پورا ڪيائين، جن ۾: جانب جو جمال (سفري يادگيريون)، ديوان احسن (سنڌي)، وليون واس ورنيون (تحقيق)، سفر زندگيءَ جو (يادگيريون)، ور ۾ ڪونهي ور، مٿي مارڳ ماڪ، جيءَ ۾ جهوري جن، وري پڇ ويٺن کان، ديوان احسن (فارسي) شامل آهن. سندس ڪيترو ئي مواد اڻڇپيل صورت ۾ پونئيرن وٽ محفوظ آهي. احسن جوکئي 8 جولائي 2018ع تي وفات ڪئي.
حوالو: ڊاڪٽر محمد علي مانجهي
1936.01.01 عيسوي
مشهور محقق، عالم، شاعر ۽ استاد احسن جوکيي جو پورو نالو احسان علي احسن جوکيو آهي. هن پهرين جنوري 1936ع ڌاري ڳوٺ يامين جوکيو، ملير ڪراچيءَ ۾ جنم ورتو.
2018.07.08 عيسوي
احسن جوکئي 8 جولائي 2018ع تي وفات ڪئي.